返黎嚕，三星期係上海渡過，寫一寫呢20日既點點滴滴。 親人 今次返上海既一大原因係探親，兩年冇見既外公依舊健康，但原來人老左真係會好似小朋友咁鬧脾氣。話說23號朝早姨姨黎左，唔知點解公公忽然同我媽媽姨姨鬧起交黎 (真係唔知點解，因為我仲訓緊-_-)結果公公負氣走左出街，唔知去左邊，最後8點幾先返屋企，兼同老媽冷戰左一陣。差唔多90歲人仲玩離家出走-___-我同老媽一邊擔心一邊燥底，唉人地老人家你又冇理由話佢怪佢，真係要好似哄小朋友咁。 外婆，因為中風既關係，一直住係老人院，22號同媽媽去探佢。外婆記憶力有點衰退，記得我係佢外孫女，但已經忘記我名字了。講真佢問我叫咩名時，個一刻真有哭既衝動 =( 司徒蕎呢個名係佢改嫁，但佢已經唔記得了。不過其它都冇咩事，身體算很健康，實在太好了。 陳來，我一個好喜歡既表弟，性格依然臭跩乖僻XD考緊高考，打算考入同濟大學建築及室內設計，聽到呢個消息，心入面其實很高興。由細到大就中意呢個表弟，大概個性相近吧，而且同樣如此地熱愛著藝術。一諗到自己有個弟弟同自己一樣，正在為藝術而努力緊，就覺得相當窩心。希望佢入到第一志願吧，我都要繼續努力，嗯嗯。 最後，全家福一張，要一直一直在一起喔。 =) 
婚禮 16號係丁越表姐結婚大日子，亦係我第一次做新娘化妝既工作。相當緊張，亦好多地方做得唔好，做新娘化妝師真係唔容易，我全日奔奔波波，忙到自戀既我當日居然連一張相都冇幫自己影過=_=不過真係一次好經驗，同埋我終於差不多見齊老豆個邊既親戚了XD話說新娘既哥哥，即係我大表哥係我化妝時用普通話問：「化妝師小姐懂廣東話嗎？」丁越表姐就話：「呢個係你表妹蕎蕎呀，你認為佢識唔識廣東話-___-」另外亦終於見到傳說中只細我兩年既侄仔XD話說佢想考入HKU，諗起如果有個人係學校叫我姑姑我就覺得好好笑XD 婚禮現場馬勒別墅 
一對新人=] 
貓 屋企樓下有隻流浪貓，唔知點解相當黏我，次次一見我就喵喵叫住咁走過黎磨蹭我，太可愛了>v<習慣5點上完網返屋企，而貓貓則習慣5點幾係門口前坐著。可惜我唔係呢度既住客，實在怕餵佢食野後佢會日日等我餵，如果唔係我一定會去買貓糧俾佢食。最後一日，離開時佢冇出現，我冇同佢講我要走啦，唔知佢依家會唔會諗，點解呢三個禮拜陪我玩個女仔唔再出現。唉一咁諗就覺得好失落。明年會再返上海一次慶祝公公90大壽，希望貓貓到時仍然係度吧。 
某下午同貓貓一齊坐係長椅上發呆 
生病 去到上海頭去到上海頭一個禮拜，其實我生病了。13號同公公媽媽去植物園參觀後，當晚就開始哮喘病發，好耐冇病發了，今次卻異常嚴重。好似根本冇任何氧氣吸入去咁，每一下呼吸都係痛。結果媽媽打電話俾傅阿姨請佢帶我去睇醫生，老媽話我唔爭氣，其實我都覺得。好討厭負面既諗法，但真係忍唔住覺得鬱悶，點解又要麻煩人地同要人擔心呢……唉好廢柴啊我…… 話說係大陸真係好講人際關係，因為阿姨既關係，去到醫院完全唔洗等，搵左兩個主任幫我睇病。我阿媽話：「哇你威啦兩個醫生圍住你轉。」我心諗係我想咁威囉病到死死下-_-醫生話大概係因為唔習慣上海既氣候，同埋去植物園搞到花粉敏感，頂我廿歲女都唔撚知自己有乜差野花粉敏感-____-我呢個敏感體質也未免太敏感了吧=.= 吊緊鹽水既我-_- 
飯局 話說今次去上海就係不斷地有飯局飯局同飯局。講真老爸老媽你地d朋友我一個都唔識，其實你地聚舊真係唔需要帶埋我-____-雖然有得食好野，但我真係對食冇乜要求……我寧願宅係公公屋企飲粥食白饅頭，然後靜靜地發下呆睇下書。 不過其中一次飯局見到好耐冇見既方芳姐，26歲而已，但佢已經結婚生女了，佢個女超可愛XD難得我會咁中意一個小孩子。睇得出方芳姐佢好幸福，但要我26歲就辭工做全職媽媽，整個世界只圍住老公同BB，只能說我個人並唔係要追求呢種幸福。 方芳姐既女廖四牙XD (因為剛剛出左四隻牙XD) 
日常 最後講下呢三個星期去過邊度同日常生活吧。 搞到我哮喘發既植物園-_-不過景色真係幾靚 
   龍華寺 
烈士園 
田子坊，一個藝術發展區，如果香港都有發展得咁成熟既藝術區就好啦 
無聊時，會係屋企附近閑逛，發現一條全係書局既街，搞到我相當興奮XD不過老媽講明今次唔准買太多書，最後只買了張愛玲既小團圓 (香港70蚊大陸28蚊搞掂，我就係等呢一刻XD)呢福相係偶然發現既一條街，幾雅緻 
然後，我迷上了一個湖南衛視既綜藝節目《快樂大本營》，同《康熙來了》一樣無厘頭，集集都笑到我抽筋XD原來呢個節目係華人社會相當出名，請到既嘉賓都好大牌。睇完呢個節目我完全愛上所有既主持人，尤其係何炅同謝娜，點解天下間會有咁搞笑既人XDD返黎香港係youtube search呢個節目，見到某集訪問蕭敬騰，笑到肚痛 (蕭敬騰也太可愛了吧XD)，強烈建議大家睇下XD 最後，總結，呢次旅程，真係好平淡-__-不過香港生活太急，偶然平淡一下都係好既 | 
